正在成都舉行的世界大學生運動會昨日完成了男、女子半馬拉松賽事，香港一共有4名運動員完成賽事，包括男子組的林穎璋、莊司陽，以及女子組的羅映潮及黃卓寧，至於香港半馬紀錄保持者黃尹雋就被大會顯示為「DNS」（未有出賽）。
港隊原先計劃派出3男2女參加半馬個人賽及男子團體賽，但最終在黃尹雋未有出戰之下，港隊在男團未能取得有效成績。至於林穎璋及莊司暘分別跑出1小時10分49秒及1小時13分43秒，在33名出賽跑手中以第27及31位完成。而女子組方面，羅映潮以1小時21分01秒取得女子組第23名。受左腿傷患困擾的黃卓寧，就負傷上陣跑出1小時28分04秒，在30位女跑手中以第29名完賽。
黃尹雋與代表團因入住選手村問題出現分歧未有出賽
至於黃尹雋未有出賽的原因，賽後世大運香港田徑代表隊領隊何浩儀及黃尹雋本人亦有各自表述，主因相信是有否入住選手村有關。領隊何浩儀在賽後接受媒體訪問稱，黃尹雋是因為個人問題沒有參賽，及因個人理由經書面向代表團申請離隊。代表團對每一位團員持有相同的紀律及標準，而入住選手村是其中必定要求。
而黃尹雋早前亦有在個人平台（Patron）上分享到未有參賽的原因。他指自己過去一個月在麗江高原練習，備戰今次的世大運，目標是「坐頭8，放頭3」，而他在賽前已經到達成都準備好比賽，但最後卻因為未有入住選手村的問題而被拒絕出賽。
黃尹雋提到「成件事我覺得係誤會，自己對比賽嘅期望太高，自己心理唔夠強大，再加上自己一啲輕視構成吧。」他指從頭到尾都不清楚運動員必需要住在選手村內「其一無人同我提過，其二係HKUSF 入面Delegation Form都無提過。」而且感覺村內環境不太舒服，所以他為了有更好的環境休息以備戰，所以就選擇自費住在比賽起點旁的酒店「因為大運村離比賽場地好遠，7:15比賽，選手村安排嘅車係4:15，但我原先book嘅酒店只係過一條馬路就係比賽場地（Book 嗰陣我一直未知唔可以住出面）。因為我一心淨係想以最好條件，最好嘅休息去比賽，所以就問代表團教練比賽前一晚可唔可以係嗰邊住，但答覆係不『太』可能，因為代表團未試過。」但黃尹雋指自己是8月4日的晚上才收到通知，指香港代表團規定運動員必須住在選手村中。
雖然黃尹雋不太滿意安排「當刻就覺得點解明明過一條馬路就可以比賽，有機會有更好安排但就要4:15搭1個鐘車過去。」但他表示當刻最終也決定回到選手村入住「我覺得自己究竟係黎比賽定比人管理，令到我心理狀態有啲影響。但我都估計代表團會改變機會都唔會大，所以心裏打算朝早收倒決定，就收拾好心情返選手村休息。」
但過程中卻收到代表團的回應，令他覺得被無視而影響出賽心情「第二日收倒嘅係佢地三點鐘會開會，等到有結果時已經四五點了，被告知如果我仲想參賽今晚就要返大運村留宿，仲有聽日一齊由大運村4:15 一齊出發。仲講咗句！『你跑唔跑其實啲高層無咩所謂嘅』，其實聽倒呢一句後我已經想即刻退賽，雖然我知我唔係世界級運動員，但我黎呢個比賽都有預備，都有想爭下名次，甚至奬牌既心，但原來我係高層眼中係真係咁可有可無。因為呢句野我自己都要消化好耐去平復心情，但最後諗起既然都集訓左5週又一場黎到，加上今屆我地香港隊有團體賽，可有可無都先跑埋佢啦。」
而黃尹雋最後都未有回到選手村入住，只是選擇在賽前的凌晨時份回到選手村與大隊集合再出發，但最終也被代表團拒絕他出賽「決定時已經傍晚，加上又已經係酒店安頓左休息，自己覺得可以最減低影響情況下凌晨2點幾先再出發番去集合吧，就係咁樣我自己都輕視左留宿呢一點，最後4點集合時代表團認為我無返去留宿，所以唔比我出賽，其實成個感受我都已經集中唔倒落去比賽度，所以分別都唔大了。」
他最後表示自己是有忽略代表團對紀律的要求，但出發點只是希望以最佳的條件出賽，最終無法出賽也有點無奈。而他下一步將會到法國訓練備戰今年在9月24日舉行的柏林馬拉松「其實講到尾，我都只係想跑好步，其他嘢真係冇諗咁多….有少少都唔知點解搞成咁。我都要時間消化下，然後準備收拾心情，準備去法國練，之後去跑Berlin，繼續希望今年內衝到奧運標 （2:11:30)。」
黃卓寧：不是一個人想點就點，必須對整個團隊有所交代，上線比賽係最基本既責任
而黃卓寧賽後亦有在社交平台上發表賽後感受，表示自己在有傷的情況仍選擇出賽，是深感作為香港代表，就有責任盡最大努力企上起跑線，盡全力完成賽事衝過終點線：「田徑大部分都係個人項目，落場比賽就係專注自身表現，但代表緊香港，就係將每一個人夾埋一齊組成一個小隊，每位隊員都有各自既責任，亦有規則要遵守，並不是一個人想點就點，亦必須對整個團隊有所交代，所以我覺得上線比賽係最基本既責任，無論最後完唔完成到，都至少盡力嘗試過，如果連最基本責任同紀律都做唔到，係唔配做運動員，更何況代表香港。」
黃卓寧在文中感謝領隊及教練的協助，並在文尾標籤「#團隊冇問題 #選手村冇問題 #究竟係邊個有問題 #人既問題」，而其餘也身處選手村的田徑隊代表包括羅映潮、林穎璋、謝俊賢在留言亦有應和。
